تاج محمد شيخ 1 اپريل 1963ع تي جيڪب آباد شهر ۾ پيدا ٿيو

تاج محمد شيخ: ليکڪ ۽ شاعر تاج محمد شيخ 1 اپريل 1963ع تي جيڪب آباد شهر جي غريب آباد پاڙي ۾ غلام سرور شيخ جي گهر ۾ پيدا ٿيو. پرائمريءَ کان ميٽرڪ تائين جيڪب آباد ۾ پڙهيو ۽ انٽر گورنمينٽ سٽي ڪاليج حيدرآباد ۾ پڙهيو. بي. اي شاهه عبداللطيف يونيورسٽي خيرپور مان 1992ع ۾ ڪيائين ۽ ايم. اي به اتان ئي سنڌي ادب ۾ (فرسٽ ڪلاس) 1996ع ۾ ڪيائين ۽ پي. ٽي. سي گورنمينٽ ايليمينٽري ڪاليج آف ايجيوڪيشن ڪنڌڪوٽ مان 1995ع ۾ ڪئي. بي. ايڊ علامه اقبال اوپن يونيورسٽي اسلام آباد مان 1994ع ۽ ايم. ايڊ فرسٽ ڪلاس ۾ شاهه عبداللطيف يونيورسٽي خيرپور مان 2003ع ۾ ڪئي. هي 1989ع کان تعليم کاتي سان وابسته آهي. هاءِ اسڪول جي زماني ۾ فوٽ بال جو رانديگر هو ۽ پنهنجي اسڪول جي ٽيم جو ڪپتان پڻ رهي چڪو آهي. هن جو ننڍپڻ کان ئي ادب سان لڳاءُ هو، غزل، نظم ۽ هائيڪي تي طبع آزمائي ڪئي اٿس. سندس شاعري، ڪهاڻيون ۽ تحقيقي مضمون مختلف ادبي رسالن ۾ شايع ٿيندا رهندا آهن. هي شيخ ويلفيئر ايسوسيئيشن جيڪب آباد جو 1991ع ۾ جنرل سيڪريٽري چونڊيو ويو. ٻاراڻي ادب تي لکيل سندس ٻن ڪهاڻين ’اميد‘ ۽ ’سرويچ سپاهي‘ کي دعوه اڪيڊمي، بين الاقوامي يونيورسٽي اسلام آباد طرفان بهترين ڪهاڻين جو انعام مليو. ڊائريڪٽر آف ايجوڪيشن لاڙڪاڻي پاران کيس 2000ع ۾ بهترين استاد جو سرٽيفڪيٽ ۽ ميڊل مليو. ان کان سواءِ 1994ع ۾ کيس نوجوان شاگرد تحريڪ جيڪب آباد پاران سرٽيفڪيٽ ڏنو ويو. سندس ڇپيل ڪتابن ۾ ”شاهه لطيف جو علامتي شعور“ (تحقيقي مقالا:2007ع)، ”قرآني معلومات“ (2008ع) شامل آهن، جڏهن ته ”حويليءَ جو در“ ڪهاڻين جو مجموعو اڻ ڇپيل صورت ۾ موجود آهي.

داخلا ۾ استعمال ٿيل تاريخون

1963.4.01  عيسوي

ليکڪ ۽ شاعر تاج محمد شيخ 1 اپريل 1963ع تي جيڪب آباد شهر جي غريب آباد پاڙي ۾ غلام سرور شيخ جي گهر ۾ پيدا ٿيو.

شخصيتون - ڀاڱي جون ٻِيون داخلائون